விமர்சனம்
விமர்சனம்: கொலைகாரன் ஹிட்டா? ஃபிளாப்பா?
விஜய் ஆண்டனி மற்றும் அர்ஜுன் நடிப்பில் இன்று வெளியான கொலைகாரன் படம் எப்படி இருக்கிறது என்று இந்த விமர்சனத்தில் காண்போம்.
விஜய் ஆண்டனியின் கல்லூரி நண்பரான ஆண்ட்ரூ லூயிஸ் இயக்கத்தில் இன்று வெளியான கொலைகாரன் திரைப்படம் விஜய் ஆண்டனிக்கு நிச்சயம் ஒரு கம்பேக் படம் என்றே சொல்லலாம்.
இரும்புத்திரை படத்திற்கு பிறகு நடிகர் அர்ஜுன் படம் முழுக்க வந்து ரசிகர்களை கதைக்குள் கச்சிதமாக இழுத்துச் செல்கிறார்.
விஜய் ஆண்டனியின் ஆர்பாட்டம் இல்லாத அமைதியான நடிப்பு, இந்த படத்தில் அவருக்கு மிகப்பெரிய பலமாக அமைந்துள்ளது.
கதைக்களம்:
தற்காப்புக்காக நாயகி மற்றும் அவரது அம்மா இணைந்து செய்யும் ஒரு கொலையில் இருந்து அவர்களை காப்பாற்ற நாயகன் விஜய் ஆண்டனி கொலை பலியை ஏற்றுக் கொள்கிறார். ஆனால், அந்த கொலையை விஜய் ஆண்டனி செய்திருக்க வாய்ப்பில்லை என எண்ணும் போலீஸ் அதிகாரி அர்ஜுன், அந்த கொலைக்கு யார் காரணம் என்பதை கண்டறிய முயற்சி செய்கிறார்.
ஆனால், விஜய் ஆண்டனியின் முந்தைய தொழில் மற்றும் புத்திக் கூர்மை அர்ஜுனை அந்த கேஸை முடிக்க விடாமல் திக்குமுக்காட செய்கிறது.
ஆனாலும், உண்மையான குற்றவாளி யார் என்றும், விஜய் ஆண்டனி யாரை கொலை செய்தார் என்ற உண்மையையும் அர்ஜுன் கிளைமேக்ஸில் கண்டுபிடித்தாரா? விஜய் ஆண்டனியை காப்பாற்றினாரா? இல்லையா என்பதே படத்தின் கிளைமேக்ஸ்.
ஆண்ட்ரூ லூயிஸ் லீலை என்ற படத்திற்கு பிறகு மிக நீண்ட இடைவெளிக்குப் பிறகு இந்த படத்தை இயக்கியுள்ளார். தான் எழுதிய கதையின் மீது வைத்திருந்த நம்பிக்கையை திரையிலும் திறம்பட காட்டியுள்ளார்.
ஆனால், பாபநாசம் படத்தின் கதையும் இந்த படத்தின் கதையும் ஒத்துப்போவது படத்திற்கு எந்தளவுக்கு பலமாக இருக்கும் என்பது போகப்போகத்தான் தெரியும்.
நல்ல கிரைம் த்ரில்லர் படத்தை எதிர்பார்த்து செல்லும் ரசிகர்களுக்கு இந்த கொலைகாரன் நல்ல சம்பவமாக இருப்பான்.
மூவி ரேட்டிங்: 3.75/5.