கிரிக்கெட்
குஜராத் டைட்டன்ஸ் ஐபிஎல் அணி உரிமையை வாங்குகிறாரா கவுதம் அதானி? என்ன விலை தெரியுமா?
அகமதாபாத்: கிரிக்கெட் ரசிகர்களுக்கு அதிர்ச்சி தரும் செய்தி ஒன்று வெளியாகியுள்ளது. ஐ.பி.எல் தொடரில் விளையாடும் குஜராத் டைட்டன்ஸ் அணியின் உரிமை மாற்றம் செய்யப்படவுள்ளதாக தகவல் வெளியாகியுள்ளது. இதனை தொடர்ந்து, இந்த அணியை தொழிலதிபர் கவுதம் அதானி வாங்க வாய்ப்பு உள்ளதாக செய்திகள் பரவி வருகின்றன.
ஏன் உரிமை மாற்றம்?
2021 ஆம் ஆண்டு, ஐ.பி.எல் தொடரில் இரண்டு புதிய அணிகள் இணைந்தன. அந்த வகையில், அகமதாபாத் நகர அணிக்கான உரிமையை சி.வி.சி கேப்பிட்டல் பார்ட்னர்ஸ் நிறுவனம் ரூ.5,625 கோடிக்கு வென்றது.
இந்த ஒப்பந்தத்தின்படி, அணி உரிமையை வாங்கிய மூன்று வருடங்களுக்குள் விற்பனை செய்ய முடியாது என்ற விதி இருந்தது. தற்போது, இந்த காலக்கெடு முடிவடைந்துள்ள நிலையில், சி.வி.சி கேப்பிட்டல் பார்ட்னர்ஸ் தங்கள் குஜராத் டைட்டன்ஸ் அணி உரிமையை விற்பனை செய்ய முடிவு செய்துள்ளதாக தகவல்கள் தெரிவிக்கின்றன.
கவுதம் அதானி ஏன் ஆர்வம் காட்டுகிறார்?
கடந்த ஆண்டு, மகளிர் ஐ.பி.எல் தொடரான வி.பி.எல் (WPL) தொடரில் அகமதாபாத் அணிக்கான உரிமையை கவுதம் அதானி குழுமம் ரூ.1,289 கோடிக்கு வென்றது.
ஏற்கனவே கிரிக்கெட்டில் ஆர்வம் காட்டி வரும் கவுதம் அதானி, குஜராத் டைட்டன்ஸ் ஐ.பி.எல் அணியையும் சொந்தமாக்க விரும்பலாம் என கூறப்படுகிறது. குறிப்பாக, அவரது சொந்த மாநிலமான குஜராத் அணியை வாங்கும் வாய்ப்பை அவர் தவற விடமாட்டார் என எதிர்பார்க்கப்படுகிறது.
இதுவரை அது குறித்த அதிகாரப்பூர்வ தகவல் எதுவும் வெளியாகவில்லை என்றாலும், கவுதம் அதானி உட்பட பல தொழிலதிபர்கள் குஜராத் டைட்டன்ஸ் அணி உரிமையை பெறுவதில் ஆர்வம் காட்டுகின்றனர் என்ற செய்திகள் பரவி வருகின்றன.
குஜராத் டைட்டன்ஸ் அணியின் மதிப்பு
தனது முதல் ஐ.பி.எல் சீசனிலேயே குஜராத் டைட்டன்ஸ் அணி சாம்பியன் பட்டத்தை வென்றது. இதன் காரணமாக, அணியின் மதிப்பு ரூ.8400 கோடிக்கும் அதிகமாக இருக்கும் என மதிப்பிடப்பட்டுள்ளது.
இந்த விவகாரம் தொடர்ந்து கிரிக்கெட் வட்டாரத்தில் பெரும் பரபரப்பை ஏற்படுத்தியுள்ளது. கவுதம் அதானி குஜராத் டைட்டன்ஸ் அணியை வாங்குவாரா என்பதை பொறுத்திருந்து பார்ப்போம்.
