இந்தியா
பெண்களுக்கான பிரத்யேக முதலீடு திட்டம்.. 7.5 சதவிகித வட்டி..
கஷ்டப்பட்டு சேமித்த பணத்தை பாதுகாப்பாக முதலீடு செய்ய மத்திய அரசு பல்வேறு திட்டங்களை வகுத்து வரும் நிலையில் தற்போது பெண்களுக்கு என்ன பிரத்யேக திட்டம் ஒன்றை அறிவித்துள்ளது. இந்த திட்டத்தின் மூலம் பெண்கள் முதலீடு செய்தால் அவர்களுக்கு 7.5% வட்டி கிடைக்கும் என்பது குறிப்பிடத்தக்கது. இந்த திட்டம் குறித்து தற்போது பார்ப்போம்.
பிப்ரவரி 1 ஆம் தேதி மத்திய நிதியமைச்சர் நிர்மலா சீதாராமன் நாடாளுமன்றத்தில் பட்ஜெட் தாக்கல் செய்தபோது வருமான வரி அடுக்குகளில் மாற்றங்கள் மற்றும் ஏற்கனவே உள்ள பல சேமிப்புத் திட்டங்களில் குறிப்பிடத்தக்க மாற்றங்களை அறிவித்தார். இந்த நிலையில் அவர் அறிவித்த முக்கிய திட்டங்களில் ஒன்று மகிளா சம்மான் சேமிப்புச் சான்றிதழ் என்பது பெண்களுக்கான புத்தம் புதிய திட்டமாகும். வரும் ஏப்ரல் முதல் இந்த திட்டம் தொடங்கப்படும்.
நாடு முழுவதும் உள்ள வங்கிகள் மற்றும் தபால் நிலையங்களில் மகிளா சம்மான் சேமிப்பு சான்றிதழ் திட்டம் அறிமுகம் செய்யப்படும். இந்த திட்டத்தை விளம்பரப்படுத்த பொதுத்துறை வங்கிகள் தனித்துவமான முயற்சிகளை பயன்படுத்த வேண்டும் என்று நிதியமைச்சர் நிர்மலா சீதாராமன் பரிந்துரைத்துள்ளார்.
இந்திய அரசாங்கத்தின் மகிளா சம்மான் சேமிப்புச் சான்றிதழ் திட்டத்தில் பெண்கள் அல்லது சிறுமிகளின் பெயரில் இரண்டு வருட காலத்திற்கு ரூ.2 லட்சம் வரை டெபாசிட் செய்யலாம். இதற்கு வட்டியாக 7.5% வழங்கப்படும்
இந்த திட்டம் குறித்து Bankbazaar.com தலைமை நிர்வாக அதிகாரி ஆதில் ஷெட்டி கூறியபோது, ‘வங்கி FDகளை விட வருமானம் அதிகம் தரக்கூடியது என்று தெரிவித்தார்.
இந்த திட்டத்தில் இணைய என்னென்ன தகுதி மற்றும் வழிமுறைகள் குறித்து தற்போது பார்ப்போம்.
மகிளா சம்மான் சேமிப்புச் சான்றிதழை ஒரு பெண் அல்லது பெண்ணின் பெயரில் மட்டுமே தொடங்க முடியும்.
மஹிலா சம்மன் பச்சத் பத்ரா யோஜனா படிவத்தைப் பெற, இந்தத் திட்டத்தை வழங்கும் அருகிலுள்ள வங்கி அல்லது தபால் நிலையத்திற்குச் செல்லவும். உங்கள் நிதி, தனிப்பட்ட மற்றும் நியமனத் தகவல்களுடன் விண்ணப்பப் படிவத்தை பூர்த்தி செய்ய வேண்டும். மேலும் அடையாளம் மற்றும் முகவரி சரிபார்ப்பு போன்ற தேவையான ஆவணங்களுடன் படிவத்தை நிரப்ப வேண்டும். டெபாசிட் தொகையை முடிவு செய்து, பணம் அல்லது காசோலையைப் பயன்படுத்தி டெபாசிட் செய்யலாம். மகிளா சம்மான் சேமிப்புச் சான்றிதழ் திட்டத்தில் நீங்கள் முதலீடு செய்ததற்கான சான்றிதழை வங்கி அல்லது தபால் நிலையம் உங்களுக்கு வழங்கும்.
இந்த திட்டத்தில் இரண்டு ஆண்டுகளுக்கு 2,000,000 நீங்கள் முதலீடு செய்தால் உங்களுக்கு ஆண்டுக்கு 7.5% வட்டி விகிதம் கிடைக்கும். அதன்படி முதல் ஆண்டில் ரூ.15,000 வட்டியும், இரண்டாம் ஆண்டு ரூ.16,125 வட்டியும் கிடைக்கும். இரண்டு ஆண்டுகளுக்கு உங்கள் அசல் தொகையுடன் சேர்த்து ரூ.2,31,125 நீங்கள் பெறுவீர்கள் என்பது குறிப்பிடத்தக்கது.
