சினிமா செய்திகள்
தடம் ஒரு தரமான சம்பவம் – தடம் விமர்சனம்!
தடையற தாக்க படத்திற்கு அருண் விஜய்க்கு இன்னொரு ஹிட் கொடுக்க இயக்குநர் மகிழ்திருமேனி பதித்திருக்கும் தடம் தான் இந்த படம்.
சமீபகாலமாக சிறந்த கதை தான் தன்னை முழு ஹீரோவாக மாற்றும் என்பதை நன்றாக புரிந்து வைத்துள்ள நடிகர் அருண் விஜய், இந்த படத்தில் எழில், கவின் என இரு வேடங்களில் இரு வேறு வித்தியாசமான நடிப்பை வெளிப்படுத்தி தன்னை மேலும், ஒரு சிறந்த நடிகராக புரொமோட் செய்துள்ளார்.
ஒரே மாதிரியான உருவ ஒற்றுமை கொண்ட அண்ணன் – தம்பி ஒரு கொலை வழக்கில் சிக்கிக் கொள்கின்றனர். இதில் யார் கொலையாளி என்பதை கண்டுபிடிக்க முடியாமல் காவல்துறை திணறும்படியான வித்தியாசமான கதைக் களத்தை இயக்குநர் மகிழ்திருமேனி எடுத்துக் கையாண்டு இருக்கும் விதத்திலேயே சிக்ஸர் அடித்துள்ளார்.
எழில், கன்ஸ்ட்ரக்ஷன் கம்பெனி நடத்துபவராகவும், அவரது சகோதரர் கவின் யோகிபாபுவுடன் இணைந்து திருட்டுத் தொழிலும் ஈடுபட்டு வருபவராகவும் நடிப்பு, உடல்மொழி என பார்க்கும் ஆடியன்சுக்கு எந்த இடத்திலும் எழில் யார் கவின் யாரென்ற குழப்பமே வராமல் கதையை நகர்த்தி இருக்கும் யுக்தி பக்காவாக படத்திற்கு உதவியுள்ளது.
பிளாஷ்பேக்கில் அம்மாவாக வரும் சோனியா அகர்வால், இப்படி எல்லாம் ஒரு அம்மா இருப்பாரா? என்ற கேள்வியை ரசிகர்கள் மனதில் விதைக்கிறது.
எழிலை காதலிக்கும் நாயகியாக தன்யா ஹோப் நடித்துள்ளார். கவின் காதலிக்கும் நாயகியாக ஸ்மிருதி நடித்துள்ளார். ஆனால், படத்தில் அதிகமாக பாடல்கள் மற்றும் நகைச்சுவை டிராக்குகள் என படத்தின் திரைக்கதையை திசை திருப்பி விடாமல், சீட் நுனியில் ஆடியன்ஸை கட்டிப் போடும் விதத்தில் திரைக்கதை ட்விஸ்ட் மற்றும் திருப்புமுனைகளுடன் அமைந்துள்ளது பாராட்டுதல்குரியது.
இரு நாயகிகளும், சிறிது நேரம் வந்துவிட்டு பின்னர் காணமல் போகின்றனர். அது படத்திற்கு பலமாகவே அமைந்துள்ளது. போலீஸ் அதிகாரியாக வரும் வித்யா பிரதீப்புக்கு தான் கூடுதல் கதாபாத்திரம், அதனை அறிந்து அவரும் சிறப்பாக நடித்துள்ளார்.
கிளாஸ் அருண் விஜய்யும், லோக்கல் அருண் விஜய்யும் அண்ணன் தம்பிகள் என தெரிய வரும் இடம் தான் படத்தில் பெரிய ட்விஸ்ட். அதை ஓப்பன் செய்ததற்கு மன்னிக்கவும், ஆனால், படத்தை பார்க்கும் பலருக்கும் இதுபோன்ற பல படங்களில் உருவ ஒற்றுமை ஒரே மாதிரியாக இருப்பவர்கள் அண்ணன் தம்பியாகத்தானே இருக்க முடியும் என்பதால், அது பெரிய விசயம் கிடையாது. ஆனால், திரைக்கதையில் இயக்குநர் மகிழ்திருமேனி அந்த இடத்தை கையாண்டுள்ள விதம் கூடுதல் சிறப்பை படத்திற்கு சேர்த்துள்ளது.
அறிமுக இசையமைப்பாளர் அருண்ராஜ் இசையில் வரும் இணையே.. பாடல் இனிமையாக இருக்கிறது. கோபிநாத்தின் ஒளிப்பதிவு ஒரே இடத்தில் பல இடங்களில் படம் நகர்ந்தாலும், சளிப்பை தட்டாத வண்ணம் ஷாட்ஸ்களை அமைத்துள்ளது.
அமெரிக்கா, ஜெர்மனி, மலேசியா, சிங்கப்பூர் போன்ற வெளிநாடுகளில், ஒரே உருவம் கொண்ட சிலர் நிகழ்த்திய உண்மையான கொலை சம்பவங்களை படத்தின் இறுதியில் இயக்குநர் காட்டும் போது, மெய்சிலிர்க்கிறது.
நன்றாக ஆராய்ந்து புதிய கதையை தமிழ் ரசிகர்களுக்கு கொடுக்க வேண்டும் என மெனக்கட்டு டீட்டெய்லிங் செய்து படத்தை அதே விறுவிறுப்புடன் கொடுத்துள்ள மகிழ்திருமேனிக்கும், எழில், கவின் என இரு வேறு நடிப்பை நம்பும்படியாக கொடுத்து அசத்தியுள்ள அருண் விஜய்க்கும் இந்த படம் மாபெரும் வெற்றியை தரும் என்பதில் சந்தேகமில்லை.
சினி ரேட்டிங்: 3.5/5.
இவளை யார் கட்டுப்படுத்துவாங்க! எக்ஸ்மென்: டார்க் பீனிக்ஸ் டிரைலர் ரிலீஸ்!
