சினிமா செய்திகள்
மணிரத்னம் உள்பட 9 இயக்குனர்கள் இணையும் படத்தை இயக்கும் லோகேஷ் கனகராஜ்!
மணிரத்தினம் உள்பட 9 இயக்குனர்கள் இணைந்து தயாரிக்கும் திரைப்படத்தை லோகேஷ் கனகராஜ் இயக்க இருப்பதாக தகவல்கள் வெளிவந்துள்ளன.
சமீபத்தில் இயக்குனர் வசந்தபாலன் தன்னுடைய கல்லூரி கால நண்பர்கள் அனைவரையும் இணைத்து தயாரிப்பு நிறுவனம் ஒன்றை தொடங்கி அந்நிறுவனம் தயாரிக்கும் திரைப்படத்தை இயக்கினார் என்பதை பார்த்தோம். அந்த வகையில் தற்போது தமிழ் திரையுலகில் உள்ள ஒன்பது பிரபல இயக்குனர்கள் இணைந்து ஒரு தயாரிப்பு நிறுவனத்தை தொடங்கியுள்ளார்கள்.
மணிரத்னம், ஷங்கர், முருகதாஸ், வெற்றிமாறன், கவுதம்மேனன், லிங்குசாமி, மிஷ்கின், சசி, வசந்தபாலன், பாலாஜி சக்திவேல் மற்றும் லோகேஷ் ஆகிய ஒன்பது இயக்குனர்கள் இணைந்து ரெயின் ஆன் பிலிம்ஸ் பிரைவேட் லிமிடெட் (Rain On Films Pvt Ltd) என்ற தயாரிப்பு நிறுவனத்தை தொடங்கியுள்ளனர். இந்த தயாரிப்பு நிறுவனத்தின் மூலம் இந்த 9 இயக்குனர்களும் மாறி மாறி படங்களை இயக்க உள்ளதாக கூறப்படுகிறது.
முதல் கட்டமாக இயக்குனர் லோகேஷ் கனகராஜ் இந்த நிறுவனத்திற்காக ஒரு படத்தை இயக்கவுள்ளார் என்பது குறிப்பிடத்தக்கது. இந்த படத்தில் கிடைக்கும் லாபம் அனைத்தையும் 9 பேரும் பகிர்ந்து கொள்வார்கள் என்பதும் குறிப்பிடதக்கது.
லோகேஷ் கனகராஜ் தற்போது கமல்ஹாசன் நடிக்கும் ’விக்ரம்’ படத்தை இயக்கி வருகிறார். இந்த படத்தை முடித்தவுடன் அவர் ஒன்பது இயக்குனர்கள் தயாரிக்கும் படத்தை தொடங்குவார் என்று எதிர்பார்க்கப்படுகிறது. தமிழ் திரையுலகில் ஒரு வித்தியாசமான முயற்சியாக எடுக்கப்படும் இந்த முயற்சி வெற்றி பெற்றால் மிகப் பெரிய சாதனை தான் என்று கோலிவுட் திரையுலகினர் தெரிவித்து வருகின்றனர்.
