‘இரும்பு மனுஷம்பா ஆரி!’- பாராட்டித் தள்ளிய ஜேம்ஸ் வசந்தன் #Viral

பிக் பாஸ் வீட்டில் சக போட்டியாளர்களின் எதிர்ப்பையும் மக்களின் ஆதரவையும் அதிகம் பெற்ற நபராக இருப்பது நடிகர் ஆரி. அவருக்கு சாதாரண மக்கள் மத்தியில் மட்டுமல்ல பிரபலங்கள் மத்தியிலும் பாராட்டுகள் குவிந்து வருகின்றன. அந்த வரிசையில் இசையமைப்பாளர் ஜேம்ஸ் வசந்தன், ஆரியைப் பாராட்டி போஸ்ட் போட்டுள்ளார்.

பிக் பாஸ் சீசன் 4 ரியாலிட்டி தொலைக்காட்சி நிகழ்ச்சி இன்னும் ஒரு சில வாரங்களில் முடிவடைய இருக்கிறது. இதனால் ஒவ்வொரு வாரமும் போட்டிகள் கடுமையாகிக் கொண்டே போகிறது. குறிப்பாக வாரத்துக்கு ஒரு எவிக்‌ஷனாவது இருக்கிறது.

தற்போதுள்ள சூழல்படி பார்த்தால் ஆரி, ரியோ, ரம்யா பாண்டியன் உள்ளிட்டவர்களில் ஒருவர் பிக் பாஸ் டைட்டில் வெல்ல அதிக வாய்ப்புகள் இருப்பதாக பார்க்கப்படுகிறது. இந்த வார எவிக்‌ஷனில் ஆஜித், கேப்ரியல்லா, ஆரி, ஷிவானி மற்றும் அனிதா ஆகியோர் உள்ளனர். வழக்கம் போல இந்த வாரமும் ஆரிதான் அதிக மக்களின் வாக்குகளை வாங்கி லீடிங்கில் இருக்கிறார்.

இந்நிலையில் ஜேம்ஸ் வசந்தன் போட்ட போஸ்டில், ‘ஆரிதான் இந்த சீசனில் பிக் பாஸ் டைட்டில் வின்னர். அது வேறு விஷயம். தனக்கு அனைத்துப் பக்கங்களில் இருந்தும் எதிர்ப்புகள் வரும்போது இந்த நபர் எப்படி அதை சமாளிக்கிறார் என்கிற ஆச்சரியம் எனக்கு வருகிறது.

என்னைச் சுற்றி இருப்பவர்கள் தூற்றும் போது, காலை வாரிவிடப் பார்க்கும்போது, குற்றம் சொல்லும் போது என்னால் சாந்தமாக இருக்க முடியாது. கடந்த 75 நாட்களாக இதைத் தொடர்ந்து சந்தித்து வரும் ஆரி, தொடர்ச்சியாக மாண்பைப் பற்றியும் அறம் பற்றியும் பேசி வருகிறார்.

தாங்கள் போடும் அனைத்துத் திட்டங்களும் தலைகீழாக போகும் ஒரு வீட்டில் இருந்து கொண்டு, இரும்பு மனிதர் போல நிற்கிறார் ஆரி. இது சிலருக்கு சுலபமாக இருக்கலாம். எனக்கு அப்படி இல்லை’ என்று உணர்ச்சிப் பொங்க புகழாரம் சூட்டியுள்ளார்.